Синоќа се одиграа првите осминафинални натпревари од второто по ранг европско клупско натпреварување во кое фаворитите забележаа победа, додека дербито Манчестер - Милан заврши без победник.
Најголемо внимание привлече пресметката помеѓу гигантите Манчестер Јунајтед и Милан на која сепак изостана враќањето на Златан Ибрахимовиќ на „Олд Трафорд“. Како што е познато, Швеѓанецот го мачи повреда.
Откако првиот дел заврши без голови, „Црвените ѓаволи“ поведоа по пет минути игра преку нововлезениот Амад Дјало, 18-годишен напаѓач од Брегот нa Слоновата Коска. Во стилот на Дидје Дрогба тој одлично го надмудри Џиџи Донарума постигнувајќи гол со глава.
Милан избегна пораз во втората минута од судиското надополнување кога данскиот дефанзивец Симон Кјер по еден корнер со глава ја затресе домашната мрежа, гол кој оди на душа на голманот Дин Хендерсон.
Рома со убедливи 3:0 го среди украински Шахтар со головите на Лоренцо Пелегрини, Стефан Ел Шаарауи и Џанлука Манчини.
Тотенхем со 2:0 оствари добра предност пред реваншот во Загреб против Динамо. Стрелец на двата гола беше Хари Кејн. Кај „Модрите“ 90 минути одиграа Стефан Ристовски и Аријан Адеми, а капитенот во последната минута беше заменет поради повреда. Двајцата и пожолтеа по еднаш во вториот дел.
Арсенал со 1:3 победи во Атина кај грчкиот шампион Олимпијакос и дојде до одлична предност на гости. Мартин Одергард, Габриел и Мохамед Елнени погодија за „Топчиите“, додека Јусеф Ел Араби за Грците.
Ајакс беше убедлив против шавјацарски Јанг Бојс постигнувајќи три гола во второто полувреме преку Дави Класен, Душан Тадиќ и Брајан Броби.
Виљареал изненади со победата од 2:0 среде Киев над Динамо. Пау Торес и Раул Албиол со по еден гол во секое полувреме беа творци на победата.
Во Прага, 1:1 одиграа Славија и Ренџерс. Романецот Николае Станчу во 7. минута донесе предност за Чесите, а Швеѓанецот Филип Хеландер во 36-тата израмни за Шкотите.
Изненадувањето на сезоната, норвешки Молде, се чини дојде до крајот на одличната авантура. Синоќа во Гранада домаќините славеа со 2:0 со головите на Хорхе Молина и ветеранот Роберто Солдадо, обезбедувајќи убава преднпост пред реваншот.
Ревашите се играат веќе наредниот четврток.
