Најчесто бараните документи ќе можат да се добијат по електронски пат. Да ги избегнеме чекањата по шалтери, апелираше денеска министерот за информатичко општество и администрација Дамјан Манчевски на попладневната прес-конференција со министерот за здравство Венко Филипче.
- Во насока на сите мерки кои ги презема владата против ширењето на корона вирусот, апелираме до сите граѓани коишто имаат потреба од услуги или различен вид на консултации со државните институации тоа да го прават по електронски пат за да се намали фреквенција на движење и редовите на чекање, особено за оние документи коишто им се најмногу потребни, изјави министерот.
Изводите од матични книги на родени и умрени може да се добијат по електронски пат, а тој документ ќе биде целосно валиден.
„На порталот uslugi.gov.mk има вкупно 128 услуги кои им се достапни на граѓаните од сечиј дом. Потврдите за документи од најпосетуваните институции како што се Фонд за здравствено и пензиско осигурување, Министерство за труд и социјална политика, АВРМ, централниот регистар, изводи од матични книги на родени, венчани и умрени можат да се добијат по електронски пат“, изјави министерот.
„За 744 други услуги може да се прочитаат сите други информации за целосното издавање на секој документ. Нема потреба да се посетува некоја државна установа за да се бараат информации. Апелираме граѓаните да ги користат овие услуги коишто им се достапни“, вели министерот.