Барселона загуби синоќа во дербито од 10. коло од Примера на гостувањето кај Атлетико со 1:0, со голот на Јаник Караско во 45. минута и веќе заостанува девет бода зад водечкиот Реал Сосиедад.
Екипата на Роналд Куман одигра слаб натпревар, особено во второто полувреме кога мораше да пристисне и да бара пресврт. Наместо тоа, токму Атлетико ја водеше играта и без поголеми проблеми го задржа водството со кое се наметна како еден од фаворитите за титулата.
Шпанските медиуми беа сериозно критички настроени кон Барселона, а Mundo Deportivo, весник кој се занимава речиси исклучиво со каталонскиот клуб, излезе со насловната страница „Скршени“.
Кризата во екипирањето на тимот во летниот преоден рок и целиот скандал со Лионел Меси имаа силно влијание врз тимот, што дури и новиот тренер Роналд Куман не може да го разбуди.
„Барса беше добра на отворањето на натпреварот, но загрижувачки е што тимот не беше во можност да реагира откако прими гол. Тимот на Куман не се закани сериозно на Облак во второто полувреме, што е алармантен знак за кризата во која падна Барселона. Но, најлошото од сè е што Пике беше повреден и не е потребно да се нагласи колку тој му значи на овој тим. Играчите беа исплашени откако тој излезе, па дури и Куман не можеше да промени ништо. Во натпреварот со кој можеше да го сврти текот на сезоната, Барселона играше во голем страв“, гласи текстот на Marca.
„Барселона влезе во многу опасна состојба на шок. Играчите од кои најмногу се очекува не се на ниво. Гризман лута по теренот, Пјаниќ и Де Јонг не можеа да одиграат ниту едно додавање, а Меси не може сам. Аргентинецот е видливо потресен од сѐ што се случува околу него, но тој е и најдобар на теренот. Освен во кризата со играта, Барса е во огромни проблеми со повредите. Фати нема да се врати со месеци и сега го нема и Пике чија повреда е исто така многу сериозна. Не изгледа добро и навивачите се свесни дека ова можеше да биде многу долга година за нив“, заклучува Marca.
