Капитенот на хрватската репрезентација, Лука Модриќ, изминативе неколку дена често се поврзува со трансфер во Саудиска Арабија, а сега реномираната Marca тврди дека знае што ќе се случи со него и Реал Мадрид.
Имено, Marca во своето денешно издание наведува дека желбата на Модриќ е јасна, а тоа е да ја заврши кариерата исклучиво на „Сантјаго Бернабеу“.
„Најспецифичен е случајот на Лука Модриќ. Хрватот сите го обожуваат во Реал, каде се врати по сјајните игри на Светското првенство. Ал Наср му даде понуда што не се одбива, но Модриќ јасно одговори дека наредната сезона сака да игра само за Реал. Решението на оваа ситуација зависи од разговорот помеѓу Лука Модриќ и Флорентино Перес, кој се очекува. Статусот на Модриќ не го наруши тоа што во последно време е резерва или оној што рано го вадат од игра“, пишува најчитаниот шпански дневен весник.
Marca се осврна и на гласините дека кралскиот клуб нема да му го продолжи договорот на 37-годишниот Модриќ.
„Анчелоти изјави дека Модриќ си го пронајде ритамот, но факт е дека Модриќ и тоа како ги чувствува последиците од настапот на Светското првенство. Меѓутоа, неспорно е и дека наскоро ќе се врати на своето вообичаено ниво, она со кое на почетокот од сезоната ги поништи сите сомнежи во него. Гласините дека Реал одлучил да не го продолжи договорот со него или дека сепак договорил трансфер во Ал Наср се тотално непоткрепени“, додава Marca.
