Легендарниот италијански тренер Марчело Липи објави дека по крајот на Азиското првенство, кое ќе се одигра во јануари и февруари, веќе нема да биде селектор на кинеската репрезентација. Со плата од 23 милиони евра тој е најплатениот селектор во светот, но одлучи да се врати во Италија за да поминува повеќе време со семејството.
Тој имаше интервју за италијанскиот весник Gazzetta dello Sport во кое зборуваше за актуелната состојба на фудбалот, но и за неговата кариера.
Липи на почетокот од интервјуто наведе една грешка која ја направил во кариерата, за потоа низ разговор да се потсети на уште две грешки за кои се кае. Неговата најголема грешка, според него, се случила веднаш по неговиот најголем успех – освојување на Светското првенство во 2006 година.
„Ја освоив секоја титула за која сонував. Меѓутоа, еднаш направив огромна грешка. Не требаше да си отидам од репрезентацијата. Подоцна погрешив уште еднаш затоа што се вратив во репрезентацијата. Зошто се вратив? Ми беше криво што си отидов веднаш по освојување на Светското првенство“, рече Липи кој со Италија стана светски шампион во 2006 година.
Италијанскиот ветеран призна дека предолго се задржал на кормилото на репрезентацијата и дека тоа му била третата голема грешка во кариерата. Липи ја предводеше Италија на Светското првенство во 2010 година, каде не се прослави.
„Третата грешка ја направив во Јужна Африка. Подоцна сфатив дека некои играчи во репрезентацијата дадоа сѐ што имаа и веќе беа изморени. Немав среќа и останав без Буфон и Пирло, а потоа се повреди и Де Роси“, се потсети 70-годишниот Италијанец.