Основачот на Facebook, Марк Закерберг, во интервју за Vox одговори на критиките упатени кон него од страна на Тим Кук, велејќи дека таквите обвинувања се целосно неосновани.
Тим Кук пред неколку дена рече дека е погрешно да се наплаќаат реклами кои можат да таргетираат одредени корисници, а притоа таквата услуга во вид на социјална мрежа да се рекламира како бесплатна.
„Аргументот дека ако луѓето не плаќаат, значи дека ние не се грижиме за нив е целосно погрешен. Воопшто не е соодветен со вистината. Реалноста е дека ние пробуваме да изградиме сервис кој ќе спои милијарди луѓе низ светот, па за да може таа идеја да биде реализирана, мораме да наплаќаме за рекламирање на социјалната мрежа“, изјави Закерберг за Vox.
Facebook се наоѓа под огромен притисок поради скандалот со Cambridge Analytica, компанија која работеше заедно со Доналд Трамп за време на претседателските избори. Неодамна беше докажано дека компанијата ги користела личните податоци на корисниците на Facebook за потоа да ги искористи за преку реклами да влијае на исходот од изборите.
Најголемиот проблем беше тоа што Facebook призна дека ги складира податоците на сите корисници и тие се отворени за огласувачите на социјалната мрежа, па на тој начин сите оние кои плаќаат за реклами можат да таргетираат одредена група на луѓе кај кои треба да се појавува рекламата.
„Вистината е дека ние би можеле да заработуваме огромни суми на пари ако го третиравме нашиот клиент како продукт. Но, намерно одбравме да не го правиме тоа“, изјави Тим Кук пред неколку дена, коментирајќи ја ситуацијата околу Facebook.
