Директорот на Јувентус, Бепе Марота, убеден е дека Масимилијано Алегри ќе остане тренер на „Старата дама“ и после тековната сезона.
Во последните неколку недели се шпекулираше дека Алегри ќе го напушти Торино после четири години, во текот на кои освои три титули шампион на Италија, по три Купа и два пати играше во финалето од Лигата на шампионите, а на пат е да го освои и четвртото Скудето.
Шпекулациите за негово евентуално заминување посебно пораснаа после убедливиот пораз на Јуве од Реал Мадрид (3:0), на домашен терен во првиот натпревар од четвртфиналето во Лигата на шампионите кон почетокот на оваа седмица.
„Масимилијано Алегри 100 проценти ќе остане тренер на Јувентус и во наредната сезона. Разговаравме по натпреварот со Реал Мадрид и двете страни имаат желба оваа долгогодишна соработка да продолжи“, порача Марота.
Италијанските медиуми често пишуваат дека Алегри сака да проба да води тим надвор од Италија, а потоа за 5-6 години да биде селектор, но очигледно дека тоа барем за сега нема да се случи.