На покана на организаторите на Интернационалниот поетски фестивал во Гранада, Никарагва, поетесата Марта Маркоска гостува на престижниот настан каде од 11 до 17 февруари го претставува своето авторско творештво.
Поетскиот фестивал во Гранада е со долгогодишна традиција и воедно претставува еден од најголемите поетски фестивали во Централна Америка. Ова е негово четиринаесетто издание, а е посветено во спомен и чест на починатите поети Фернандо Силва Еспиноза од Никарагва и поетот Роберто Соса од Хондурас.
Маркоска досега има единаесет авторски објави и препеви на нејзините песни, на преку 11 јазици, меѓу кои и најновиот препев, „Црне рупе у нама“, во издание на „Граматик“ од Белград, чие излегување беше промовирано неодамна.
Препевот на песните од книгата „Црни дупки во нас“, од македонски на шпански, го направи Сања Михајловиќ – Костадиновска, а нивната лектура, познатиот кубански поет, Виктор Родригез – Нунез.
„Никарагва е исклучително пријателска земја. Луѓето во Гранада живеат како во некоја огромна комуна во која владее утопија. Сѐ се случува на улиците, врие од живот, бидејќи, сѐ е излезено надвор, дење-ноќе. Вчерашниот поетски караван се одвиваше во должина од 4 километри, а беше проследен со карневал. Сите поети се претставивме пред огромна публика која беше дел од поворката на карневалот“, изјави Маркоска за порталот Кајгана од Гранада.
Годинава, на интернационалниот поетски фестивал во Гранада гостуваат 118 поети од целиот свет. Поетесата Марта Маркоска е единствена претставничка од Македонија.
