Мартина Навратилова соопшти дека го победила ракот на грлото и на дојката.
66-годишната поранешна тенисерка минатата година објави дека се соочува со тешка дијагноза, но најави и дека ќе се бори онолку колку што е потребно за да ја победи подмолната болест. На крајот успеа.
„Колку што знам, веќе немам рак“, рече Навратилова во интервју со Пирс Морган на TalkTV. Легендарната тенисерка изјави дека ѝ останале уште две недели превентивно зрачење, но дека во основа приказната е завршена и дека сега го чека само конечниот процес на заздравување.
Пред дијагнозата Навратилова планирала да посвои дете со сопругата Јулија Лемигова, но после тоа решила да не брза бидејќи не е сигурна колку долго ќе биде жива, а особено колку долго ќе може да се грижи за детето.
„Бев во паника три дена. Мислев дека нема да го видам следниот Божиќ. Размислував само за тоа што сакам да правам до крајот на мојот живот. Можеби ова звучи глупаво, но размислував каков бесен автомобил сакам да возам ако имам уште една година живот“, рече Навратилова.
