Масакр во БиХ: Домар на гимназија ги убил директорот, секретарката и професорка

Се случи масакр во средното училиште во Сански Мост во Босна и Херцеговина. Полицијата потврди дека во нападот загинале директорот на училиштето, секретарката и една професорка. Трикратниот убиец бил домарот на училиштето, а неговите жртви биле вработени со кои претходно бил во конфликт.

Тројца убиени, застрелани од чуварот

Домарот на училиштето со автоматска пушка ги убил директорот на гимназијата, Нијаз Халиловиќ, професорката по англиски јазик, Гордана Ниџан, и училишната секретарка, Нисвета Кљуниќ.

„Пукањето се случило во 10:15 часот. Машко лице со огнено оружје убил тројца вработени во училиштето. По тоа, најверојатно, се обидел да си пресуди и добил тешки физички повреди. Тој е префрлен на Ургентниот центар во Бања Лука. Полицијата е на самото место“, изјави Аднан Бегановиќ, портпарол на МУП на Унско-санската жупанија.

Пукал чуварот Мехмед Вукалиќ, пишува Nezavisne novine.

Во моментот кога нешто по 10 часот во училиштето беше извршено тројното убиство, во тек биле поправните испити, но нема потврда дали и колку ученици имало во зградата, информираат босанските медиуми.

Како што неофицијално дознава N1, напаѓачот веќе извесно време имал несогласувања со раководството на училиштето и претходно се жалел на дискриминација.

Против него е спроведена дисциплинска постапка и утринава, според неофицијални информации, тргнал во целна потрага по лицата што биле во тие дисциплински комисии и пукал во нив. N1 неофицијално дознава дека напаѓачот имал и психички проблеми.

Во тек е полициска истрага, а училиштето е опколено од огромни полициски сили, јавува Nezavisne novine. На самото место се собрале голем број професори, кои се во шок бидејќи многумина од нив биле сведоци на нападот.