Масимилијано Алегри уште ужива во одморањето од фудбалот откако замина од клупата на италијанскиот првак Јувентус на крајот на минатата сезона, но рече дека ќе мора да се врати на почетокот на следната.
Поранешниот тренер на Милан и Јуве го поврзуваат со бројни великани во европскиот фудбал, а еден од клубовите кои би сакале да го имаат Италијанецот на својата клупа е и француски ПСЖ.
Алегри е во Франција каде ја промовира својата книга, но ги демантираше гласините дека ќе дојде на „Паркот на принцовите“.
„Нема преговори со ПСЖ. Би било покажување непочитување кон другите ако преговарам со Леонардо. Во Париз сум, градот е прекрасен, но тука сум за да ја промовирам книгата. Уште не знам ништо за мојата иднина“, рече Алегри, но сепак најави враќање.
Откако се појави информацијата дека почнал да учи англиски јазик, многумина шпекулираа дека кариерата ќе ја продолжи во Премиер лигата.
„Морам да се вратам во септември. Ако се навикнам на одмор, веќе нема да работам. Затоа морам пак да учам. Англиски учам прво за себе, за да можам да комуницирам кога одам во странство“, рече Алегри.