Сопственикот на Twitter, Илон Маск, ја поддржа идејата за создавање „алтернативен телефон“, во случај Apple и Google да ја отстранат неговата платформа од Apple Store и Play Store.
Тој ѝ одговори на објавата на конзервативната коментаторка Лиз Вилер дека треба „сам да направи свој уред, доколку има блокада“.
„Секако, но се надевам дека нема да дојде до тоа. Ако нема друг избор, ќе направам алтернативен телефон“, напиша Маск.
Маск неодамна направи одредени промени на Twitter. Го обнови профилот на поранешниот претседател Доналд Трамп, направи анкета во која корисниците беа поканети да коментираат за можна масовна амнестија на суспендирани профили (доколку не го прекршиле законот или не се вклучени во спамирање).
Последниот коментар на Маск доаѓа откако Фил Шилер, одговорен за водењето на Apple Store, го избриша профилот на Twitter, пишува New York Post.
Сега се поставува прашањето дали цврстиот став на Маск за слобода на говорот може да доведе до прекршување одредени правила на Apple и Google Store.
Џоел Рот, поранешен шеф на одделот за безбедност на Twitter, смета дека социјалната платформа ризикува да биде блокирана доколку не ги почитува правилата.
„Ова би го отежнало пристапот до Twitter услугите за милиони потенцијални корисници“, изјави тој.
Сигурно е дека Twitter би бил лишен од голема добивка, па најавата за евентуален „алтернативен телефон“ не треба да изненадува.
На интернет ќе видите дека повеќе сајтови пишуваат за „новиот телефон“ на Маск, но засега нема ништо од тоа. Приказната е од 2020 година кога италијанскиот дизајнер Антонио Де Роса претстави негова визија која ги обединува технологиите на Tesla и на SpaceX.
