На настан во Лос Анџелес, Елон Маск го претстави првиот целосно електричен пикап наречен Cybertruck. Цената на основниот модел е 39.900 долари.
Станува збор за шестиот автомобил на Tesla откако компанијата е основана во 2003 година, а воедно е и најголемиот експеримент. На пазарот ќе му биде ривал на Ford F серијата, која е најпродаван пикап во САД, подолго од 40 години.
Маск претходно изјави дека има намера да ја постави цената на основниот модел под 50.000 долари, а додаде и дека побарувачката за пикапот би можела да биде помала во однос на Model S и Model X.
На настанот одржан вчера Маск го претстави главниот дизајнер Франц фон Холцхаузен кој демонстрираше што може пикапот да издржи. Тој ги скрши прозорците, но куршумот не мина низ нив. Маск претходно тврдеше дека стаклата се отпорни на куршуми со калибар од 9 милиметри.
Основниот Cybertruck го придвижува еден електричен мотор, а од Tesla ветуваат досег од 402 километри. Верзијата со два мотора и погон на сите четири тркала ќе чини 49.900 долари со досег од 483 километри. Третата верзија има три мотори, погон на сите четири тркала и досег од 804 километри, за неа треба да се издвојат 69.900 долари.
Поевтините верзии ќе се појават на пазарот во 2021 година, а поскапите во 2022 година. Пикапот од 0 до 100 километри на час забрзува за помалку од 7 секунди во случај на послаб модел, а околу 3 секунди се потребни за најсилниот модел.
Маск претстави и целосно електрично ATV теренско возило кое може да се натовари на пикапот. Цената не е откриена.
