Маск објави видео од апсење: Ова е Британија или Советскиот Сојуз?

Илон Маск ја продолжува расправијата со британскиот премиер сер Кир Стармер за немирите што ја зафатија Велика Британија.

Милијардерот објави видео на X на кое се гледа како полицајци апсат маж поради навредливи коментари на Facebook.

„Уапсен поради коментар на Facebook! Дали е ова Британија или Советскиот Сојуз? Дали е ова вистина @Community Notes“, напиша Маск, означувајќи ја услугата за проверка на факти на X.

На видеото се гледа како полицаец му кажува на мажот дека е уапсен под сомнение дека неправилно користел електронска комуникациска мрежа.

Споменатото кривично дело се однесува на испраќање пораки со „јасно навредлив, непристоен или заканувачки карактер“ и може да резултира со максимална затворска казна од шест месеци или парична казна.

Маск, исто така, го праша Стармер: „Зошто сите заедници не се заштитени во Британија?“.

Тоа беше коментар на видеото на кое се гледа толпа маскирани луѓе околу паб, а некои од нив веат палестинско знаме. Маск даде слични коментари во понеделникот, откако Стармер рече дека нема да толерира напади врз муслиманските заедници.

Џамиите и хотелите во кои се сместени баратели на азил беа меѓу целите на немирите низ Британија минатата недела, пишува Sky News. Расправијата меѓу британскиот премиер и американскиот мултимилијардер започна кога Маск изјави дека „граѓанската војна е неизбежна“ во Велика Британија.

Немирите започнаа во Саутпорт минатиот вторник по фаталниот напад со нож во кој беа убиени три девојчиња. Немирите потоа се проширија и во другите градови низ земјата. Аксел Рудакубана, млад човек роден во Кардиф, чии родители се по потекло од Руанда, е одговорен за убиството на трите девојчиња.