Технологијата што го поврзува човечкиот мозок и компјутерскиот интерфејс им овозможува на луѓето со невролошки заболувања да комуницираат со своите мисли и да контролираат различни уреди.
Компанијата на Илон Маск, Neuralink, објави дека почнува да прифаќа апликации од луѓе кои сакаат да го вградат експерименталниот компјутерски интерфејс N1 во нивниот мозок.
PRIME (кратенка за Precise Robotically Implanted Brain-Computer Interface/Прецизен роботски имплантиран мозочен интерфејс) привлече интерес поради фактот што првенствено е наменет за лица со квадриплегија (поради оштетување на 'рбетниот мозок), како и за заболени од ALS (амиотрофична латерална склероза).
А за некој да одлучи за експерименталната примена на оваа технологија, ќе треба да има најмалку 22 години, како и доследен и сигурен негувател.
Во 2022 година, Маск ја објави својата намера да го вгради уредот во сопствениот мозок, но сè уште е малку веројатно дека тој самиот би можел да биде меѓу првите што ќе го направи тоа.
Neuralink е основана во 2016 година со цел да развие технологија која го поврзува човечкиот мозок и компјутерскиот интерфејс во систем кој им овозможува на луѓето со невролошки заболувања да комуницираат и да можат да контролираат различни уреди.
Така, на пример, лице кое страда од парализа може потенцијално да го користи својот паметен телефон замислувајќи ги движењата на рацете. Сепак, на долг рок, постојано амбициозниот Маск сугерира дека технологијата би можела дури и да го подобри човечкиот мозок со „супер спознание“.
Neuralink сега сака да ја тестира и процени ефикасноста и безбедноста на користењето PRIME, односно неговиот имплант N1 и хируршкиот робот R1, известува digitaltrends.
Компанијата, исто така, сака да ја оцени почетната функционалност на нејзиниот интерфејс мозок-компјутер (BCI - brain-computer interface) за да им овозможи на луѓето со парализа да контролираат различни уреди преку нивните мисли.
Примарната цел на BCI, велат тие, е „да им даде на луѓето способност да го контролираат курсорот на компјутерот или тастатурата користејќи ги само своите мисли“.
И други компании развиваат слични компјутерски технологии, па така BrainGate успеа да му овозможи на човек кој страда од парализа да комуницира преку своите мисли, претворајќи го својот замислен ракопис во текст.
