Гостувајќи во Good Time Show, Илон Маск се пофали дека во склоп на истражувањата на Neuralink за безжични импланти, еден е вграден во мозок на мајмун.
„Имаме мајмун со безжичен имплант кој може да игра видеоигри со помош на мислите“, рече Маск, додавајќи дека станува збор за многу едноставна видеоигра.
Тој вели дека мајмунот всушност не е свесен за имплантот бидејќи истиот е безжичен и не се гледа каде е вграден. Токму фактот дека е направен таков имплант би можел да биде чекор кон создавање на такви уреди за луѓе.
Сепак, Маск директно не зборуваше за тоа кога би го имале првиот човек со вграден чип. Според пишувањето на Bloomberg, снимката од мајмунот со чип ќе биде објавена за еден месец.
Маск рече дека целта на евентуалното користење на таа технологија врз луѓето е да им се овозможи контролирање на уредите, како што се на пример смартфоните, но со помош на мозокот.
Основачот на Tesla на Twitter напиша дека краткорочната корист од чипување ќе им биде од помош на луѓето кои преживеале повреди на мозокот или ‘рбетот, додека долгорочната е симбиоза меѓу човечката и вештачката интелигенција.