Се случуваат грешки, рече директорот на Tesla по неуспешниот тест за изджливост на прозоците на најновиот модел на американскиот производител на електрични возила.
Елон Маск на премиерата на пикапот Cybertruck во Лос Анџелес се најде во непријатна ситуација кога неговите тврдења дека возилото има неуништливи стакла беа демантирани од тест изведен на самото место, пред присутната публика.
Маск го претстави главниот дизајнер Франц фон Холцхаузен кој беше задолжен за демонстрацијата, но на големо изненадување на сите, а особено на Маск, стаклото на страничниот прозорец напукна кога во него беше фрлена метална кугла. За да биде срамот поголем, тестот го повторија и на задното стакло, кое исто така напукна.
Директорот на Tesla тврди дека знае зошто се случило ова. На претходната демонстрација што исто така беше изведена на премиерата, удираат со чекан во предната врата, што ја ослабува структурата на конструкцијата и затоа напукна предното странично стакло кога во него беше фрлена металната кугла.
Маск рече дека го згрешиле редоследот на тестовите – прво требало да ја фрлат куглата, а потоа да ја тестираат цврстината на челичните врати со чеканот.
Сепак, ова не даде објаснување зошто тогаш напукна задното стакло, кога тестот со чеканот не беше изведуван на тој дел од автомобилот.
Се претпоставува дека на задната врата не било намонтирано истото „неуништливо“ стакло како на предните, Маск „не го знаел тоа“, па по неуспешната демонстрација побрза да се оправда со втора која само го „закопа“ подлабоко.
Во неговите обиди да се оправда дека стаклото навистина е неуништливо (Маск претходно тврдеше дека стаклата се отпорни на куршуми со калибар од 9 милиметри), шефот на Tesla обави снимка од пробните тестови изведени непосредно пред премиерата на Cybertruck, на кое се гледа дека стаклото не напукнува.
Цената на основниот модел на првиот електричен пикап на Tesla е 39.900 долари, а Маск се надева дека овој модел ќе биде конкурентен на серијата Ford F, најпродаваниот пикап во САД во изминативе 40 години.
Основниот Cybertruck го придвижува еден електричен мотор, а од Tesla ветуваат досег од 402 километри. Верзијата со два мотора и погон на сите четири тркала ќе чини 49.900 долари со досег од 483 километри. Третата верзија има три мотори, погон на сите четири тркала и досег од 804 километри, за неа треба да се издвојат 69.900 долари.
Поевтините верзии ќе се појават на пазарот во 2021 година, а поскапите во 2022 година. Пикапот од 0 до 100 км/ч забрзува за помалку од 7 секунди во случај на послаб модел, а околу 3 секунди се потребни за најсилниот модел.
