Масовниот убиец и осуден терорист Андерс Брејвик испратил писма до преживеаните од неговите напади, како и до нивните семејства, јавуваат норвешките медиуми.
Писмата содржат извадоци од неговиот манифест што тој го напишал пред да убие 77 луѓе во планираниот напад на 22 јули 2011 година.
Писмото испратено до организацијата Support Group, која ги поддржува преживеаните и семејствата на жртвите од нападот, се состои од осум страници „бела пропаганда“. Слични пораки беа испратени и до младинскиот огранок на Норвешката работничка партија, чии членови беа цел на нападот, како и до парламентарци.
Норвешкиот политичар Торбјорн Вереиде е меѓу оние кои го добиле писмото.
„Го добив писмото и ми беше многу непријатно. Апсурдно е некој што ви вперил оружје сега да ви праќа писмо“, рече тој.
Државата веќе одлучи да ги блокира комуникациите на Брејвик поради загриженоста дека тој би можел да контактира со истомисленици. До 2016 година испратил и примил околу 3.000 писма.
Брејвик во 2011 година го изврши најсмртоносниот напад во Норвешка од Втората светска војна. Тој на 22 јули истата година постави бомба во комбе во Осло, при што загинаа осум лица, а неколку стотици беа повредени.
Потоа, на 40 километри северозападно од Осло на малиот остров Утоја, тој се маскирал во полицаец и пукал во членовите на младинскиот огранок на Норвешката работничка партија, при што уби 69 луѓе. Преживеаја околу 500 луѓе.
Брејвик доби максимална казна од 21 година затвор.
