Графенот се смета за материјалот на иднината поради неверојатната издржливост и многуте начини за употреба. Истражувачи од Европа објавија упатства при негово производство.
Книгата во која се опишани начините за изработка на графен е составена од Graphene Flagship, конзорциум составен од неколку универзитети и компании. Конзорциумот е еден од трите големи научни проекти кои ги финансира Европската Унија, со буџет поголем од милијарда евра.
Овој тим истражувачи се надева дека упатствата ќе им помогнат на произведувачите подобро да се запознаат со овој материјал кој би можел да воведе револуција во многу индустрии.
Графенот е материјал потенок милион пати од влакно, а 200 пати е потврд од челик. Спроведува електрицитет и топлина подобро од останатите материјали. Поради неговите карактеристики како флексибилноста и еластичноста може да биде корисен во многу индустрии, во аеронаутиката, истражување на вселената, медицината, електрониката, енергетската индустрија и слично.
