Откако Манчестер Јунајтед со синоќешната победа изби сам на лидерската позиција во Премиер лигата, сега го очекува најголемиот предизвик - дербито со актуелниот шампион Ливерпул.
Со минимални 1:0 благодарение на голот на Пол Погба во 71. минута „Црвените ѓаволи“ синоќа ги грабнаа трите бода да гостувањето кај Барнли и осамнаа на врвот во Премиер лигата со 3 бода пред бранителот Ливерпул.
Токму клубот од „Енфилд“ е следниот предизвик за тимот на Оле Гунар Солскјер кој никој не го ни вклучуваше во потесниот круг на кандидати за титулата.
„Ова е најголемото дерби во Англија и одиме таму за да се натпреваруваме и да видиме каде сме во однос на еден од најдобрите тимови во лигата. Мислам дека сме подготвени“, вели Немања Матиќ во изјава за клупската телевизија MUTV.
„Одигравме 17 натпревари и сме први на табелата. Тоа покажува нешто. Не игравме пет или шест натпревари па некој да рече дека веројатно сме имале среќа. Но, по 17 натпревари, дефинитивно не е среќа, туку се работи за квалитет“, убеден е Србинот.
„Сепак, не смееме да се опуштиме, мора да останеме сконцентрирани до крај, да одиме од натпревар во натпревар. Во фудбалот секогаш наредниот натпревар е важен; наредниот е најголемо финале, па ќе видиме“, заврши Матиќ кој синоќа одигра 90 минути.
Големото дерби Ливерпул - Мначестер Јунајтед се игра в недела од 17:30 часот.