Немања Матиќ се повлече од репрезентацијата откако Србија не успеа да се пласира на Европското првенство, а причините ги наведе во лошото раководење на Фудбалскиот сојуз.
Играчот на Манчестер Јунајтед, кој по мајка е Македонец од тетовското село Волковија, преку објава на Twitter извести дека напишал соопштение за проблемите во српскиот фудбал кое го испратил во медиумите.
„Почитувани љубители на фудбалот во Србија“, почнува Матиќ. „Останав должен да објаснам за причините поради кои се повлеков од репрезентацијата на Србија. Пред почетокот на квалификациите за ЕУРО на луѓето во ФСС им посредочив за неколку работи кои би можеле да нѐ чинат пласман. Им рекв дека доколку тие работи не се променат ќе налетаме на некоја мала, но озбилна репрезентација и ќе ни ја наполни мрежата (ни се случи 5:0 од Украина). Исто така, им реков дека нема да се пласираме ни преку Лигата на нации (таму ни се случи Шкотска)“, пишува Матиќ.
Потоа Немања пишува за тоа како Хрватска за претседател го има Давор Шукер, а Црна Гора го има Дејан Савичевиќ, двајца великани на фудбалката игра. Смета дека таков човек ѝ е потребен и на Србија каде на чело е бизнисменот Славиша Кокеза.
„Решението за спас на нашиот фудбал е едноставно: Немања Видиќ. Сметам дека со својата работа, почитта, фудбалското знаење, професионализмот и посветеноста на фудбалот е способен нашиот фудбал да го однесе во фудбалскиот врв, каде и сам беше како играч“.
Инаку, братот на Немања, Урош Матиќ, пред неколку години сакаше да настапува за репрезентацијата на Македонија за која има право бидејќи дедо му е роден во Тетовско. За жал, поради административни проблеми до ден денес не заигра.