Кратката авантура на Маурицио Сари дојде до самиот крај и веќе од утре Италијанецот ќе биде нов тренер на Кристијано Роналдо и неговите колеги во Јувентус. Оваа информација беше официјализирана и од страна на италијанскиот клуб, кој остана без тренер минатиот месец, по заминувањето на Масимилијано Алегри.
Маурицио Сари потпиша тригодишен договор со Јувентус и утре официјално ќе биде претставен како тренер на италијанскиот шампион.
Само една година претходно тој ја напушти Серија А за да стане нов тренер на Челзи, каде што во единствената сезона успеа да го врати тимот во Лигата на шампионите и да ја освои Лига Европа. Претходно беше тренер на Наполи, со кого успешно го предизвикуваше Јувентус во борбата за титулата во Серија А.
Како што пренесуваат англиските медиуми, Челзи решил да го раскине договорот со 60-годишниот Сари откако Јувентус исплатил 5 милиони како отштета за неговиот трансфер.
„Откако ја освоивме Лига Европа, тој [Маурицио Сари] ни даде до знаење дека сака да се врати во родната земја. Како прво, сакаше да биде поблиску до неговото семејство, но исто така сметаше дека ќе биде подобро за неговите стари родители доколку тој се врати во Италија“, изјави директорката на Челзи, Марина Грановскаја.
Во Јувентус, Сари ќе наследи моќен тим предводен од Кристијано Роналдо, кој има намера во блиска иднина да атакува на трофејот од Лигата на шампионите. Минатата сезона тие несреќно беа елиминирани од тимот на Ајакс, кој беше најголемото изненадување во ЛШ.
