Се чини дека долгоочекуваното продолжение на „Top Gun: Maverick“ не урива рекорди само во киносалите, туку и по бројот на мажи кои поради филмот се расплакале. Па така, многу мажи ширум светот открија дека Том Круз им ги насолзил очите.
„Top Gun: Maverick“ во првиот викенд на прикажување заработи рекордни 134 милиони долари, а како дел од причините за успехот се наведуваат и големата доза носталгија и лудориите на Том Круз. Но, изгледа дека филмот успеа и во нешто друго.
Така, на социјалните мрежи голем број мажи признаа дека филмот ги расплакал, особено односот меѓу Маверик и синот на неговиот покоен најдобар пријател.
„Вечерва во кино се расплака еден повозрасен маж. Можеби тоа бев јас, но не е важно“, гласи еден од коментарите.
Комичарот Стивен Кастило коментираше на оваа тема, признавајќи дека „најлош дел од филмот било кога неговата девојка го прашала дали плаче“.
„Луѓето се свртеа и ме погледнаа“, напиша комичарот.
Мажите со објави на Twitter се тешат едни со други, покрај различни комични објаснувања дека очите им се насолзиле бидејќи им „влегла мушичка во око“ или „поради затворениот простор полн со полен“.