Мбапе има 67 дена да го стигне рекордот на „Феноменот“ Роналдо

Порталот Squawka специјализиран за фудбалски статистики и анализи, денеска ја објави листата на најголемите вундеркинд појави во последниве 20 години, според нивниот голгетерски учинок на тинејџерски години.

Повод за актуелизирањето на оваа листа е тоа што се приближува 20-тиот роденден на Килијан Мбапе кој моментално е на второ место на листата, зад Роналдо Луис Назарио де Лима.

Легендарниот Бразилец, кој од неодамна стана претседател на шпанскиот прволигаш Реал Ваљадолид, пред да наврши 20 години имаше постигнато 92 голови како играч на Крузеиро, ПСВ Ајндховен и за репрезентацијата, а Мбапе моментално има 64 погодоци во официјалните настапи за Монако, ПСЖ и за Франција.

Шансите до 20 декември годинава да ја надомести разликата од 28 голови објективно гледано не се големи, но Мбапе со четири погодоци во дербито од француското првенство против Лион покажа дека тоа и не е така невозможно.

Асот на ПСЖ во наредните 67 дена ќе може да одигра максимално 17 натпревари, од кои 13 за клубот во домашната и Лигата на шампиони (два против Наполи и по еден против Ливерпул и Црвена ѕвезда), како и четири за „триколорите“ – две пријателски (Исланд и Уругвај) и две во Лигата на нации (Германија и Холандија).

Во просек, Мбапе би требало да ја затресе противничката мрежа 1,64 пати по натпревар (под услов да не пропушти ниту еден), имајќи предвид дека од 18 август има просек од 1,22 гола, односно девет погодоци на 11 средби.

Шансите да го стигне и надмине Роналдо сигурно ќе му беа поголеми да не пропуштеше три натпревари поради суспензија.

Последниот меч како 19-годишник Мбапе најверојатно ќе го одигра на 15 декември кога ПСЖ ќе гостуваат кај Дижон.