Мбапе ја презеде целата одговорност по новиот кошмарен натпревар

Фудбалерите на Реал Мадрид доживеаја пораз во 19. коло од Ла Лига, бидејќи „Кралскиот тим“ на „Сан Мамес“ во Билбао беше поразен од Атлетик со 2:1, а во центарот на вниманието повторно се најде Килјан Мбапе, кој се огласи по натпреварот и промашениот пенал.

На стартот од вториот дел Атлетик поведе преку Алекс Беренгер, кој во 53. минута погоди за 1:0, а потоа да продолжи агонијата на Мбапе.

Во 68. минута беше досуден пенал за Реал Мадрид, одговорноста ја презеде Мбапе, а неговиот слаб удар го сопре голманот Хулен Агиресабала. Иако Реал потоа израмни преку Џуд Белингам, две минути подоцна Горка Гурузета ја врати предноста на Баскијците, што се покажа и како конечни 2:1.

По средбата, Мбапе повторно беше мета на критики, поради што се огласи на социјалните мрежи.

„Лош резултат. Голема грешка во натпревар во кој секој детаљ е важен. Ја преземам целосната одговорност за тоа. Тежок момент, но најдобро време е да ја сменам оваа ситуација и да покажам кој сум“, изјави Французинот, кој неодамна и на натпревар од Лигата на шампионите против Ливерпул не успеа да искористи пеналот.

Реал во следното коло ќе ѝ гостува на Жирона, а кон средината на неделата ќе има и натпревар од Лигата на шампионите во Бергамо против Аталанта.