Додека младиот Французин сѐ уште беше во Монако, неговата кариера можела да замине во сосема друг правец бидејќи постоела опција да заигра за бундеслигашот од Дортмунд.
Замислете каков тандем денес би имала Борусија: Ерлинг Браут Холанд и Килјан Мбапе. Брзи и екплозивни, двајцата млади и веќе докажани голгетери.
Поранешниот скаут на Борусија, Свен Мислинтат, открива дека во 2016 година и неговиот клуб бил во игра за потписот на Мбапе и тоа за играчот беспари да се пресели во Дортмунд.
Мбапе за брзо време стана посакуван играч уште од неговото деби за Монако во декември 2015, на крајот од сезоната 2015/16 веќе десетици големи клубови имаа искажано интерес за неговиот потпис, а во таа долга колона била и Борусија.
„Навистина е голема штета што не успеавме да го земеме Килјан. Тогаш тој во одреден период беше слободен играч и многу клубови го бараа. Нажалост, не можевме да победиме во таа трка“, рече Мислинтат во подкастот „Kicker meets DAZN“.
„За да можевме во било кое време да му го украдеме Мбапе на Монако ќе требаше да понудиме навистина баснословен договор“, додаде.
Тоа лето Мбапе остана на „Луј II“ и наредната сезона го предводеше Монако и до титулата во Лиг 1, како и полуфинале во Лигата на шампионите. Потоа за 180 милиони евра се пресели во ПСЖ, каде е и денес.