Младиот француски напаѓач Килијан Мбапе летово од Монако премона во редовите на ПСЖ иако се шпекулираше дека ќе потпише за Реал Мадрид, а во комбинација беше и Манчестер Сити. Осумнаесетгодишниот фудбалер сега објасни зошто донел таква одлука.
„Сметав дека во ПСЖ ќе играм повеќе отколку во Реал Мадрид, а ги одбив и Манчестер Сити. Сепак, тоа не беше ‘не’ за тренерот Пеп Гвардиола, кој живее за фудбалот. Освојувал трофеи секаде каде што работел, ја пренесува својата страст на играчите, па тие сакаат да играат подобро. Разговарав со него, ми објасни како би ме искористил во неговите тактики. Сепак, на крај му реков ‘не’ на Сити, а не нему“, изјави Мбапе.
Тој откри дека на почетокот немал намера воопшто да го напушти Монако, но сега сака да оствари успех со ПСЖ во Лигата на шампиони.
„Немав намера да го напуштам Монако на крајот на сезоната, но одлучив да го сменам ставот. Тоа ќе ви го објаснам подоцна. Сега сонувам да ја освојам Лигата на шампиони оваа сезона. Лесно е да се каже тоа во септември, имаме добар тим, но мора да се покажеме на теренот“, вели Мбапе.
