Мечка влезе во населено место во Јапонија и повреди четири лица, по што e убиена, објави јапонската телевизија НХК.
Жител на градот Сапоро, каде оваа година треба да се одржи олимпискиот маратон и олимписката трка во брзо одење, бил прв кој во раните утрински часови ја забележал мечката на пат.
Веднаш потоа полицијата на Хокаидо напиша на Twitter дека започнала потрага по мечката.
– Ако забележите мечка, бидете многу внимателни, веднаш напуштете го подрачјето и јавете се на 110, предупреди полицијата.
На снимките се гледа како мечката трча низ улица, преминува една сообраќајница и гребе на влезната врата од касарна, а потоа бега.
Полицијата подоцна соопшти дека мечката нападнала тројца мажи, од кои еден е потешко повреден, и една 80-годишна жена. Двајца мажи од локалното ловечко друштво ја застрелале мечката во близина на аеродромот Сапоро.
