Живееме во време и состојба кои не сме можеле да ги замислиме ни во најлудите соништа, ни да им ги посакаме ни на најлошите непријатели. Време кое покажа дека самите сме си најлоши непријатели.
Сите различно ги поднесуваме информациите, неизвесноста, стравот поврзани со пандемијата и немаме сите ист праг на толеранција кога станува збор за слободата на движење или потребата од блиска социјализација. Ама тоа важи во нормални времиња, не во вонредни. Прилагодливоста на условите е највисок знак на интелигенција, па прилагодувајте се паметно.
За сите оние кои очекуваат да бидат пофалени, потапкани, наградени, одликувани, величани за тоа што седат дома, носат маска, држат растојание од 2 метри и мијат раце, најновата информација е дека медали ќе има. Освен тоа што министерот за здравство ве вика херои, сега ќе може и да покажете доказ колку сте биле храбри за време на пандемијата на COVID-19.
Медал ви е што сте живи и здрави.
Медал ви е што можете да се гушкате барем со луѓето со кои живеете во ист дом.
Медал ви е што не се плашите дека сте заразни и дека ќе ги заразите децата, партнерот, родителите, браќата, сестрите, снаата, цимерот... кога се враќате од прошетка на сонце.
Медал ви е што можете мирно да спиете ако ја имате привилегијата да работите од дома, а не сте здравствен работник, текстилен работник, вработен во маркет, возач во ЈСП или работите некоја друга работа за која мора да излезете од дома и да бидете во контакт со други луѓе.
Медал ви е што не сте заразени и не мора да живеете во една соба додека некој друг за вас пазари, ви прави за јадење, се грижи за вас бидејќи вие не можете и не смеете да излезете од дома.
Медал ви е што не сте позитивни на вирусот и не живеете во страв дека ќе ги заразите сите дома кога одите во веце (со оглед на тоа дека повеќето семејства и заедници во земјава живеат во живеалишта со едно веце/бања).
Медал ви е што можете да излезете да прошетате, на безбедна дистанца и да го почувствувате пролетниот ветер, бидејќи не сте болни или носители на вирусот.
Медал ви е што ќе може да раскажувате како ја поминавте пандемијата.
А бидејќи Олимписките игри се откажани, а на Запад сѐ е подобро и кај нас ништо не чини, по американски модел - за сите ќе има медал за учество.
*Авторот на текстот е интроверт и тоа не влијаеше врз расудувањето при пишувањето на овој текст.