Градската зоолошка градина во Варшава најави дека ќе почне да им дава на слоновите медицинска марихуана, како дел од пилот-проектот за тестирање како таа ќе делува за лекување на стресот и анксиозноста што ги чуствуваат животните.
Медицинската марихуана во некои делови од светот се користи во негата на коњи и кучиња, но сега за првпат ќе има обид да се користи на слонови, објаснува Агњешка Чујковска, ветеринарката одговорна за овој проект.
„Ќе се обидеме да најдеме нова природна алтернатива за веќе постоечките методи за борба против стресот“, објасни таа.
Во зоолошката градина во Варшава редовно го мерат нивото на стрес кај слоновите со следење на работата на нивните хормони, како и анализа на нивното однесување.
Чујковска објаснува дека нејзиниот тим ќе има конкретни резултати од истражувањето дури по две години. Ако резултатите се задоволителни, слична терапија ќе им се дава и на други животни во зоолошката.
„Слоновите ќе добиваат неколку капки медицинско масло од канабис, два до три пати на ден. Една од женките кај нас веќе го проба маслото“, изјави Чујковска за The Guardian.