Насловната страница на денешното издание на британскиот таблод Daily Mail го красат две дами: премиерките на Велика Британија и на Шкотска.
И додека светот зборува за излезот на Британија од ЕУ, весникот сексистички го свртува вниманието кон физичкиот изглед на Тереза Меј и на Никол Старџон, со насловот: „Батали Брегзит, која има поубави нозе?“
Случајот со насловната страница наиде на бура од критики од јавноста, особено бидејќи во текстот внатре се наведува дека на премиерките „нозете им се најдобро оружје“.
„Еве што се случува кога ќе дозволите некој пијан и перверзен вујко од свадба директно да оди да уредува весник“ и „Се јавија 50-тите, си ја бараат насловната назад“, се само дел од коментарите на корисниците на Twitter кои ја споделија веста.
Лабуристот Џереми Корбин рече дека е 2017 година и дека сексизмот треба да биде во минатото, додавајќи дека Daily Mail треба да се засрамат.
Секако, веднаш се појавија досетливи поединци со солидни фотошоп способности кои објавија насловна страница со фотомонтажа на мажи политичари во шорцеви наместо премиерките.