Рускиот тенисер Даниил Медведев го крена гласот против актуелниот календар на АТП и истакна дека тој треба да се ревидира во иднина, за на сите да им биде подобро.
Во моментов четвртиот тенисер во светот смета дека помалку важните турнири, односно оние од серијата 250, треба да се преселат на крајот на годината и на нив би играле само оние играчи кои бркаат бодови за следната сезона.
„Сегашниот календар не е добар. Мислам дека во првиот дел од годината фокусот треба да биде на турнирите од Мастерс серијата, како и на Грен слемовите, без да се играат турнири од серијата 250“ , рече Медвдев и појасни ја неговата позиција:
„Тие треба да се префрлат на крајот на годината, па ќе биде ситуација оние играчи што биле добри во текот на годината да ја завршат сезоната во октомври, а оние што не биле да ги имаат овие, условно кажано, мали турнири преку кои би собирале бодови за Австралија опен и следната сезона“.
Пред Медведев за промена на календарот зборуваа уште неколку познати светски играчи, а меѓу нив е и Гркот Стефанос Циципас, кој има исти ставови како и Русинот.
