Еден од најблиските сојузници на Владимир Путин, поранешниот руски претседател Дмитриј Медведев, на Telegram објави која е крајната цел на Москва.
Медведев ги повтори нашироко отфрлените тврдења на Кремљ за „нацистичките симпатизери во Украина“, велејќи дека „страстен дел од Украинците се молат за Третиот рајх во последните 30 години“.
Во склад со реториката на Кремљ, Медведев продолжува да ја доведува во прашање Украина како независна земја, наведувајќи ја „псевдо-историјата на украинската државност“.
На крајот се вели дека крајната цел на Москва во конфликтот е „да изгради отворена Евроазија – од Лисабон до Владивосток“.
Претходно, европските лидери разговараа за идејата за слободна трговска зона која се протега од португалскиот главен град, најзападниот во Европа, и Владивосток, рускиот град на Далечниот Исток каде завршува Транссибирската железница. Сепак, ваквите изјави на толку близок соработник на Путин веќе се оценети како причина за вознемиреност кај оние кои сметаат дека Москва има империјалистички амбиции надвор од Украина.
Медведев претходно рече дека тврдењата дека руските сили егзекутирале цивили во Буча се лаги и пропаганда на Украина и Западот и дека тие имаат за цел да ја дискредитираат Русија.
„Тоа се лаги кои созреаја во циничната имагинација на украинската пропаганда“, рече Медведев. „Тие лаги се измислени за огромни суми пари“, заклучи тој.