Заменикот шеф на Советот за безбедност на Русија, Дмитриј Медведев, изјави дека Русија ќе направи се за да спречи појава на нуклеарно оружје кај своите непријателски соседи, како што е на пример Украина.
„Нашите непријатели сакаат да даваат големи изјави. Се расфрлаат со поими како што се слобода, демократија, мисија. Всушност, ова е само ритуална вербална дијареја. Фонтани на дијареична демагогија со зла, пискава реторика долго време се испробано оружје на англосаксонскиот свет со кои се опсипува остатокот од човештвото во обид да се брани ексклузивноста и правото да владеат со светот“, напиша Медведев на Телеграм.
Нагласи дека „Русија има целосно право да користи нуклеарно оружје“.
„Морам уште еднаш да потсетам, за оние глувите кои само себе се слушаат. Русија има право да користи нуклеарно оружје ако е потребно. Во однапред одредени случаи – ако ние или нашите сојузници се нападнати со овој вид оружје или ако агресијата на конвенционално оружје се заканува на опстанокот на нашата држава“, смета Медведев.
Тој додаде:
„Ако заканата над Русија ја премине утврдената граница на опасност, ние ќе мора да одговориме. Не ни треба дозвола за тоа, ниту долги консултации. И тоа дефинитивно не е блеф“.