Свет

Меј до пратениците: Ви давам последна шанса за усвојување на Договорот за Брегзит

21. мај 2019 - 18:48 | МИА

Лондон, 21 мај 2019 (МИА) – Британската премиерка Тереза Меј денеска им порача на пратениците во Долниот дом на Парламентот во Вестминстер дека ќе им даде последна шанса да го одобрат Договорот за истапување на Велика Британија од ЕУ, што нејзината Влада и Брисел го постигнаа лани во ноември.

Како што јави ДПА, со цел да ги придобие пратениците од редовите на нејзината Конзервативна партија и од опозициската Лабуристичка партија да го поддржат Договорот, Меј им вети повеќе отстапки, вклучувајќи и гласање во Парламентот за одржување втор референдум за Брегзит.

Таа нагласи дека пратениците кои нема да го поддржат Договорот при четвртото изјаснување по него на почетокот на јуни, всушност ќе „гласаат за запирање на Брегзит“ и ќе придонесат за неспроведување на резултатите од Референдумот од 2016 година, на кој мнозинството Британци се изјаснија за истапување на Велика Британија од ЕУ.

Долниот дом на британскиот Парламент досега во три наврати го одбиваше Договорот за Брегзит, но Меј се надева дека конечно во четвртиот обид пратениците ќе го одобрат договорениот текст.

Американската инвестициска банка JP Morgan денеска ја зголеми веројатноста за Брегзит без договор од 15 на 25 проценти, наведувајќи оти нивното основно сценарио е дека поранешниот шеф на британската дипломатија Борис Џонсон ќе стане нов премиер, по што ќе следат општи избори, а потоа уште едно одложување на излегувањето на Велика Британија од ЕУ до крајот на годината.

JP Morgan ја зголеми веројатноста за ново одлагање на британското напуштање на Унијата на 60 проценти од претходните 50 отсто, а во исто време ја намали опцијата за истапување на земјата од ЕУ во согласност со условите на Договорот за Брегзит на Меј, на 15 проценти од претходните 35 отсто.

Коментирај