Мексиканскиот претседател јавно му понуди на Џулијан Асанж политички азил во неговата земја.
„Ќе побарам од министерот за надворешни работи да ја сработи потребната процедура за да испратиме барање до британската Влада да го ослободи г-дин Асанж и за Мексико да му понуди политички азил“, рече претседателот Андрес Мануел Лопес Обрадор.
Левичарскиот лидер ја поздрави одлуката на британскиот суд да го одбие барањето на САД за екстрадиција на 49-годишниот Австралиец врз основа на тоа дека е склон кон самоубиство.
„Асанж е новинар и заслужува правда. Мексико има долга историја на давање азил“, додаде претседателот на Мексико.
Нема да биде прв пат Мексико да додели политички азил некому бидејќи тоа го има напрвено во неколку наврати вклучувајќи ги никарагвајскиот антиимперијалист и локален херој Сесар Аугусто Сандино, потоа рускиот револуционер Лав Троцски, а последен во низата е поранешниот боливиски претседател Ево Моралес.
Асанж е баран во САД по 18 обвиненија, сите поврзани со објавувањето на 500 илјади тајни документи поврзани со воените дејствија на САД во Авганистан и Ирак кои ги објави во 2010 година и кои станаа познати како ВикиЛикс.
Доколку Мексико му додели азил на Асанж ќе ризикува да ги влоши односите со соседот САД под новата администрација на Џо Бајден.
