Фрида е полициско куче од специјалната единица на Мексиканската морнарица и за нејзиниот херојски подвиг добу пофалба од претседателот на Мексико Енрике Пења Нието.
Многумина што ја имаат видено оваа убавица на дело, како трага по преживеани по разорниот земјотрес што пред три дена го погоди јужно Мексико, ја сметаат за вистински херој.
Лабрадорот Фрида со денови предано ги пребарува урнатините во Мексико Сити по земјотресот од 7,1 степени по Рихтеровата скала во кој досега загинаа 245 луѓе.
Пред само две недели, Фрида спаси 12 луѓе по уште посилниот земјотрес што го погоди градот Оаксака.
Луѓето ѝ се восхитуваат на нејзината храброст и херојски подвизи, а благодарение на социјалните мрежи, за кратко време Фрида стана сензација ширум светот.
Претседателот на Мексико за неа на Twitter напиша:
„Ова е Фрида. Таа помогна да се спасат 52 човечки животи во природни катастрофи во земјата и во странство.“
Кога работи на терен, Фрида носи специјална заштитна опрема, очила за да не ѝ влегува чад и прашина во очите и посебни обувки за да може да се движи по тешко проодни терени.
За оваа тешка и одговорна работа Фрида била обучувана откако има две години.
Со долгогодишното искуство има стекнато титула Специјалист за трагање по изгубени лица.
