Мексико е подготвено да му понуди политички азил на Џулијан Асанж и со тоа да ја поддржи одлуката на британскиот судија да одбие екстрадиција на основачот на Викиликс во САД, изјави претседателот на Мексико, Мануел Лопес Обрадор.
– Асанж е новинар и заслужува шанса. Јас се залагам за неговото помилување, рече Обрадор. Тој додаде дека Мексико ќе му пружи заштита.
Британската судијка Ванеса Бараjтсер претходно денеска соопшти дека основачот на Викиликс, Џулијан Асанж (49) нема да биде екстрадиран во САД по обвинението за шпионажа, објаснувајќи дека тоа би била репресивна мерка поради неговата психичка состојба. Таа истакна дека Асанж најверојатно би извршил самоубиство доколку биде испратен во САД.
Владата на САД соопшти дека ќе ја обжали пресудата.
Соединетите Американски Држави побараа екстрадиција на Асанж, кој се соочува со вкупно 18 точки од обвинението во САД и се соочува со 175 години затвор доколку биде осуден за шпионажа и предавство за објавување тајни државни документи за американските воени и дипломатски активности, особено во Ирак и Авганистан.
