Поранешниот мексикански министер за одбрана Салвадор Синфуегос Сепеда помагал во шверц на тони кокаин, хероин, метамфетамин и марихуана во САД во замена за мито.
Ова го покажуваат судските документи што вчера беа отворени за јавноста.
Синфуегос (72) работел за картелот H-2 додека беше министер за одбрана од 2012 до 2018 година под поранешниот претседател Енрике Пења Нието, објавија властите, пренесува АП.
Илјадници пресретнати пораки покажуваат дека поранешниот министер обезбедил да не се организираат воени операции против тој картел, туку против неговите ривали.
Синфуегос е исто така обвинет за предупредување на лидерите на картелите за истрагата на САД во врска со нивните операции и употреба на соработници на сведоци и информатори, што резултираше во убиство на член на картел за кој шефовите погрешно мислеа дека им помага на американските служби.
Синфуегос беше уапсен на аеродромот во Лос Анџелес во четвртокот, врз основа на наредба на Американската агенција за контрола на наркотици (ДЕА). Според АП, висок мексикански службеник изјавил дека Синфуегос бил уапсен кога пристигнал на аеродромот со членовите на неговото семејство, кои биле ослободени.
Бројни членови на владата од времето на Пења Ниета биле вклучени во случаи на корупција на високо ниво, од кои некои вклучуваат врски со организиран криминал.
Апсењето на Синфуегос се случи една година откако Џенаро Гарсија Луна, министер за безбедност од времето на поранешниот претседател Фелипе Калдерон, беше уапсен во Тексас под сомнение дека примил мито од милиони долари од нарко-картелот.
