Пред неколку месеци, анонимен извор близок до Меланија Трамп тврдеше дека првата дама на САД се подготвува за живот надвор од Белата куќа и „најверојатно без Доналд“ бидејќи наводно сака живот далеку од медиумското внимание.
Белата куќа тогаш не излезе со став за ваквите тврдења.
Во ексклузивно интервју со Шон Ханити за Fox News што се емитуваше вчера, Меланија Трамп отворено зборуваше за можноста за втор мандат во Белата куќа.
„Сметам дека мојот сопруг одлично си ја работи работата. На земјата никогаш не ѝ одело подобро. Затоа, да, сакам земјата да продолжи во таа насока“, рече таа.
Нејзината изјава, очекувано, наиде на различни реакции во јавноста, а интернетот „експлодира“ со коментари во дијаметрално спротивни насоки – едни ја фалат првата дама и ѝ честитаат што го поддржува сопругот, додека други сметаат дека тоа не се нејзини зборови, напротив, многу потсетуваат на речникот на Доналд Трамп.
Во книгата „Fire and Fury: Inside the Trump White House“, американскиот новинар Мајкл Вулф тврди дека кога Доналд Трамп бил избран за претседател, Меланија плачела – но не од среќа.
Белата куќа активно ги негира скандалозните тврдења изнесени во книгата во која е опфатен периодот од изборната кампања на Трамп и почетокот на владеењето на неговата администрација.
„Госпоѓа Трамп ја поддржа одлуката на нејзиниот сопруг да се кандидира за претседател, дури и го охрабри во намерата. Таа беше уверена дека ќе победи и беше многу среќна кога се случи тоа“, изјави портпаролката на првата дама, Стефани Гришам, во јануари, 2018 година.