Најголемите автомобилски компании постојано работат на нови технологии кои го прават возачкото искуство подобро, или во случајов, побезбедно. Mercedes-Benz развива нова безбедносна технологија која ќе ги оневозможи судирите на автомобили.
Благодарение на вештачката интелигенција, технологијата која ќе ја има новиот концепт ESV (Experimental Safety Vehicle) константно ќе ја унапредува асистенцијата во текот на возењето.
Директорот за развој во Mercedes, Ола Каленијус, кој од мај ќе стане генерален директор на групацијата Daimler, истакна дека автономијата и софистицираните системи за асистенција ќе го намалат бројот на сообраќајни несреќи, бидејќи најчестата причина за нив е грешка од човечки фактор.
Каленијус додаде дека дел од новата ESV технологија е скоро подготвен за да се најде во сериско производство и дека наскоро може да очекуваме дека ваквиот систем ќе се најде во новите автомобили на Mercedes.
Возилото ќе собира податоци од возењето и ќе ги споделува со централниот сервер за да научи како да обезбеди поквалитетна и побезбедна асистенција за време на возењето. Концептот ќе содржи и технологија за подобра заштита на патниците, со која дури и во случај на потешка несреќа, тие ќе избегнат тешки повреди.
Последниот ESV концепт на Mercedes дебитираше во 2009 година и го користеше тогаш новиот S40 Hybrid како почетна точка со бројни безбедносни технологии.
Во случај на судир, металната конструкција на концептот се ширеше за да овозможи дополнителна заштита, а во случај на страничен удар седиштата се поместуваа кон средината на возилото за да го зголемат просторот за патниците, кои на тој начин би избегнале фатални повреди.
