Германската канцеларка Ангела Меркел ги повика германските граѓани на дисциплиниран начин да се придржуваат на новите рестриктивни мерки воведени денеска и ги намали надежите дека е можно брзо враќање во нормала по четири недели, колку што ќе останат во сила мерките.
„Треба да се подготвиме за Божик во сенка на коронавирусот. Но, тоа не мора да биде Божик на осаменоста", рече Ангела Меркел по состанокот со т.н. корона кабинет.
Таа исто така најави дека нема да ги има вообичаените прослави на новогодишната ноќ.
„Лудите новогодишни забави или масовни прослави за новогодишната ноќ нема да бидат можни. Светлото на крајот од тунелот е сè уште многу далеку“, рече Меркел.
Таа уште еднаш ги повика граѓаните да се придржуваат до сегашните и новите мерки за борба против ширењето на коронавирусот.
„Секој од нас одлучува дали ќе го паметиме овој ноември како заеднички успех, а придржувањето кон мерките е клучно“, рече Меркел.
Таа објасни дека сегашната состојба со зголемувањето на бројот на заразени сепак предизвикува причина за загриженост.
„Денеска бележиме трикратно зголемување на бројот на заразени лица во споредба со средината на октомври. Ако ова продолжи, капацитетите на болниците ќе бидат преоптоварени“, рече Меркел, додавајќи дека треба да се дојде до ситуација во која повторно ќе биде можно да се следи текот на заразата, што веќе некое време е невозможно.
Германската канцеларка објасни дека во Германија бројот на новоинфицирани на 100.000 жители во последните 24 часа е 127, и дека целта е тој да падне под 50.
„Треба да го намалиме бројот на контакти, да работиме од дома што е можно повеќе, да избегнеме посета на роднини и да избегнеме прослави. Така ќе создадеме услови за поднослив декември“, рече Меркел и додаде дека може да го разбере незадоволството на некои луѓе од новите мерки, но дека нејзина задача е да ги убеди луѓето во неопходноста од овие мерки.
На прашањето зошто е забранета посета на ресторани и театри, но не и на цркви и училишта, германската канцеларка го објасни ова со уставни причини.
„Правото на образование и практикување религија заземаат висока позиција во Уставот, а таа одлука е донесена со експерти по уставно право“, рече Меркел.
Таа истакна дека повторно ќе се сретне со премиерите на федералните провинции во средината на овој месец за да утврди дали новите рестриктивни мерки даваат резултат.