Германската канцеларка Ангела Меркел и францускиот претседател Емануел Макрон оваа недела ќе извршат притисок над претседателот на САД, Доналд Трамп.
Целта е Трамп трајно да ја изземе ЕУ од американската царина на увоз на челик и алуминиум, изјави европската комесарка за трговски прашања Сесилија Малмстрем.
Ако казнените царини сепак бидат воведени, ЕУ, како што додава таа, ќе биде подготвена за возвратни мерки.
„Очекуваме безусловно и трајно изземање“, изјави оваа комесарка.
Макрон денеска ја почнува својата тридневна посета на Вашинготн, а Меркел ќе патува во четврток.
Малмстрем зборуваше и за новиот трговски договор на ЕУ со Мексико, кој, како што вели таа, е сигнал за остатокот на светот, но и за администрацијата на Трамп.
„Прелиминарниот договор кој е постигнат во саботата би требало да биде финализиран оваа година, а тој претставува силен сигнал за целиот свет“, изјави Малмстрем.
Мексико и Евопската Унија постигнаа договор околу нов трговски компромис, со кој практично ја елиминираат царината во меѓусебната трговија.
Обемен документ ќе ја поедностави царинската процедура и ќе ги укине тарифите „практично за сите“ производи, со кои тргуваат земјите членки на ЕУ и Мексико, пренесува „CNN“, повикувајќи се на соопштението од Европската комисија објавено во саботата.
