Германската канцеларка Ангела Меркел ги повика помладите членови на нејзината партија да ги пополнат министерските места во новата Влада.
„Мора да се осигураме дека не влегуваат предвид само оние над 60 години, туку и помладите луѓе“, рече таа за една германска телевизија.
Таа исто така застана во одбрана на „мачните“ отстапки што беа направени за централно-левичарските Социјалдемократи (СПД) со цел да се постигне коалициски договор.
Договорот следеше по неколкумесечно натегање откако изборите не дадоа јасен победник.
Овој договор треба да биде одобрен од 460.000 членови на СПД, чие гласање се очекува во март.
„Сега треба да покажеме дека можеме да почнеме со нов тим“, рече Меркел.
Нејзината Христијанско-демократска унија има шест министерски места.
Некои членови на нејзината конзервативна партија среќни што клучна позиција како Министерството за финансии отиде во рацете на СПД и стравуваат дека фискалната дисциплина на претходниот министер за финансии Волфганг Шојбле ќе стане минато.
Меркел побрза да ги окуражи овие загрижени членови.
„Сакам да кажам дека ние ги одобривме тие политики и дека министерот за финансии не може едноставно да прави што сака“, рече таа.
