По падот на нафтените берзи кон крајот на април, веќе втора недела по ред се бележи подобрување.
Берзите реагираат на олабавувањето на рестриктивните мерки што се очекува да донесе значително подобрување на побарувачката, а новиот договор на ОПЕК влијае со намалувањето на количините што се планира да се произведуваат.
Според веб-страницата Investing, на лондонската берза цената на барел нафта минатата недела пораснала за повеќе од 18% на 30,97 долари, додека на американската берза барел нафта се продава поскапо за 33%, односно 24,74 долари.
Цените на нафтата со месеци беа во опаѓање и достигнаа најниско ниво во изминатите две децении. Причината за тоа беше економската криза што ја намали индустриската активност, а со тоа и продажбата на нафтата, но исто така и преполните терминали кои предизвикаа продажба на мајските фјучерси по негативни цени, што беше историски раритет.
Растот на цените во изминатите две недели е предизвикан од очекувањата на брокерите дека олабавувањето на рестриктивните мерки ќе ја зголеми побарувачката за нафта.
„Пазарот и понатаму е прекумерно снабден, а намалувањето на производството на ОПЕК и другите доброволни намалувања исто така помагаат да се кренат цените. Наскоро се очекува да се појават и првите срамежливи знаци на закрепнување на побарувачката, имајќи го предвид постепеното ублажување на рестриктивните мерки“, вели Џејсон Гамел, аналитичар на Jefferies.