Ѕвездата на Барселона е загрижен за формата на тимот по бламажата завчера против Осасуна, пораз кој стави капак на лошата форма на Каталонците.
Лео Меси веројатно не памети кога Барселона била во полоша форма од сега. По трите нерешени со кои дозволи Реал Мадрид да направи разлика на врвот, Барса врза три победи од кои две килави со по 1:0 над слабите Еспањол и Ваљадолид, а последно што направи е поразот дома 1:2 од Осасуна.
„Не очекувавме, ниту пак сакавме Ла Лига да заврши на овој начин. Сепак, тоа е нашето лице сезонава. Бевме неконзистентни, слаби, противниците нѐ победуваа со интензитет и лесно ни дава аголови. Изгубивме премногу бодови кои не требаше да ги изгубиме“, вели Меси.
„Мора да бидеме самокритични, почнувајќи од играчите, но вклучително и целиот клуб. Реал победи на сите нивни натпревари, но ние сме Барселона и сме обврзани да победуваме на секој натпревар. Мора да се погледнеме себеси, не противниците. Она што го одигравме на последните натпревари остава простор убаво да се замислиме“, смета Аргентинецот.
Со едно коло до крајот во шпанската Лига, Барселона ќе заврши како втора. Она што им останува на Каталонците е Лигата на шампионите каде на 8 август ги чека реваншот од осминафиналето против Наполи. Првиот натпревар во Неапол заврпи 1:1.
„Скоро реков дека доколку продолжиме вака како што играме ќе ни биде тешко да ја освоиме Лигата на шампиони, а веќе се покажа дека не беше доволно ни да се освои Ла Лига. Ако не преземеме нешто и не ги промениме работите, тогаш нема да го победиме Наполи“, заврши Меси.