Аргентина ја победи Полска со 2:0 и од првото место во групата Ц се пласираше во осминафиналето.
Стрелци на головите беа Алексис Мекалистер во 46. и Џулијан Алварез во 67. минута. Аргентина во осминафиналето ќе игра против Австралија, а Полска против Франција. Лионел Меси не успеа да погоди од пенал во 39. минута, одлично одбрани Војчех Шчесни.
Капитенот на Аргентина беше нервозен кога мечот се ближеше кон крајот, што најдобро се виде во последните секунди, кога беше фаулиран од полскиот капитен Роберт Левандовски.
Беше ситуација во близина на центарот на теренот. Левандовски бранејќи го резултатот што ја води Полска понатаму, малку поцврсто влезе во дуелот со Меси.
Полјакот веднаш му се извини, но Меси го игнорираше и не сакаше да му подаде рака како знак дека извинувањето е прифатено.
На крајот од натпреварот Левандовски и Меси останаа во срдечен разговор.
Неколку пати Меси му кажа нешто на уво со рацете околу устата, за никој да не може да прочита за што зборува. И Меси рече дека никогаш нема да открие што си кажале.