Најдобриот фудбалер на Барселона и шесткратен освојувач на наградата Златна топка, Лионел Меси, сака промена на позицијата тренер во клубот од стадионот „Камп Ноу“.
Според британските медиуми, Меси, кој откако ја загуби титулата во Ла Лига, ја критикуваше играта и ситуацијата во целиот клуб, смета дека е крајно време за промени.
Оттука, тој апелирал до челниците на Барселона да направат сѐ за да го доведат досегашниот менаџер на Лидс Јунајтед, Аргентинецот Марсело Биелса.
После две години работа во Јоркшир, Биелса успеа да го врати Лидс во Премиер лигата по 16 години, а Меси верува дека тој би бил идеалниот тренер за „Блаугранас“.
Се чини дека деновите на Кике Сетјен на „Камп Ноу“ се одброени, иако тој доби поддршка од клубот за да го води тимот во Лигата на шампиони.
Се верува дека претседателот на Барселона, Пеп Марија Бартомеу сака да го доведе поранешниот играч на Барселона, Чави Ернандес, на позиција тренер, но тој е прилично резервиран за враќање во клубот каде имаше голем успех како играч.
Затоа Меси смета дека неговиот искусен сонародник Биелса, која неодамна го прослави својот 65-ти роденден, би бил идеален кандидат за спроведување на значителни промени.
Факт е дека Биелса допрва треба да ја продолжи соработката со Лидс, а доколку навистина пристигне понудата на Барселона, прашање е како клубот од Јоркшир ќе го задржи.
