Лионел Меси наскоро ќе го продолжи договорот со Интер Мајами, сѐ со цел да се врати во Барселона и да игра за неа следната сезона.
Најдобриот фудбалер во историјата има договор со Интер Мајами до декември 2025 година, а шпански El Nacional пренесува дека е блиску до продолжување на соработката до декември 2026 година.
Доколку Меси го продолжи договорот и тимот од Мајами игра трета сезона во МЛС лигата, би се активирала клаузулата според која американските клубови можат да позајмуваат играчи на европските клубови во периодот кога не им трае сезоната, а тоа е од ноември до крајот на февруари.
Токму поради ова правило Тјери Анри дојде на позајмица во Арсенал од Њујорк Ред Булс во јануари 2012 година.
Тоа би значело дека Интер би можел да го позајми Меси од ноември 2025 година до крајот на февруари 2026 година во Барселона, а корист ќе имаат и клубот и легендарниот Аргентинец.
Барселона повторно би го имала во своите редови најдобриот фудбалер во историјата, а Меси со настап во Ла Лига би ја задржал формата и би бил подготвен за Светското првенство кое ќе започне во јуни 2026 година во САД, Канада и Мексико.
