Аргентинскиот фудбалер Лионел Меси по рекорден седми пат ја освои Златната топка, престижно признание кое се доделува на најдобриот фудбалер во една календарска година.
„Повторно сум тука. Мислам дека е клучно тоа што ја освоив Копа Америка. Пред две години мислев дека тоа ќе биде мојата последна освоена Златна топка. Меѓутоа, кога го победивме Бразил на „Маракана“ тоа беше нешто навистина посебно“, изјави 34-годишниот Лионел Меси кој во 2021 година постигна 40 голови за тимот и за репрезентацијата.
На второто место е Роберт Левандовски, а на третото Жоржињо.
„Сакам да му кажам на Роберт Левандовски дека ми е чест што со него се натпреварував за Златната топка оваа година. Ти заслужи да ја имаш оваа награда. Минатата година сите се сложија дека ти си победник. Мислам дека навистина ја заслужи наградата и мора да ја имаш во својот дом“, рече Меси.
Меси ја освои престижната награда во 2009, 2010, 2011, 2012, 2015 и 2019 година.
